په ولایتونو کې د پوهنې فعالیتونه

پنجشیر او میدان وردګ:
د پنجشیر او میدان وردګو ولایتونو په ښوونځیو کې د لاس مینځلو نړیواله ورځ ونمانځل شوه.
د یادو ولایتونو په ښوونځیو کې چې کومې غونډې جوړې شوې وې. د پوهنې، عامې روغتیا او یو شمېر سیمه ییزو ریاستونو مسوولینو خبرې وکړې، چې هر یو یې د اسلام د سپېڅلي دین له نظره د پاکوالي په ارزښت خبرې وکړې او له زده کوونکو یې وغوښتل، چې په خپل ورځني ژوند کې پاکوالی او د لاسونو مینځلو ته پام وکړي.
لوګر:
د لوګر ولایت د پوهنې ریاست میاشتنۍ اداري غونډه د لوګر ولایت د پوهنې رئیس مولوي جنت ګل عزیز په مشرۍ جوړه شوه. د دې ولایت د پوهنې رئیس د یوې میاشتې ترسره شوي فعالیتونه یې وڅیړل او د راتلونکو پلانونو په اړه یې کارکوونکو ته لازمې لارښوونې وکړې.
دایکندي:
د یونیسف موسسې په مالي مرسته د دایکندي ولایت د ۶۱ ښوونځیو ښوونکو ته د ښوونکو د اغیزمنې ښوونې او زده کړي تر سرلیک لاندې لس ورځنی ورکشاپ جوړ شو.
د دغه ولايت د پوهنې رئيس مفتي رحمت الله مدثر د ښوونکو د ظرفيتونو د لوړولو په برخه کې دا ډول پروګرامونه اغېزمن او اړين وبلل او په دې برخه کې يې د يونيسف ادارې څخه د لا زياتې مالي مرستو غوښتنه وکړه.
لغمان:
د لغمان ولایت د سرې میاشتې ریاست د دغه ولایت د پوهنې رئیس شاه جهان ساجد ته د پوهنې په برخه کې د هغه د نه ستړي کېدونکو خدمتونو له امله ستاینلیک ډالۍکړه.
 د لغمان د پوهنې رئیس له پوهنې سره د دغه ریاست له مرستو مننه وکړه او د ستاینلیک په ورکولو یې ورته مبارکي وویله.
نورستان:
د نورستان د پوهنې ریس تاج محمد جاهد د نورستان ولایت د پوهنې له کارکوونکو سره وکتل او د یوې غونډې په ترڅ کې د دوی هڅې او فعالیتونه وستایل.
په دې ناسته کې مسوولینو هم خپلې ستونزې او وړاندیزونه ښاغلي جاهد ته وړاندې کړل، چې د ستونزو په حل کې یې د مرستو ژمنه وکړه.