په پکتیکا کې د یو ښوونځي ودانۍ پرانېستل شوه
د پوهنې وزارت_پکتیکا: د پکتیکا ولایت د مرکز اړوند د نجونو د صلحي مرکزي لیسي نوې جوړه شوې ودانۍ د یو لړ مراسمو په ترڅ کې ګټې اخیستنې ته وسپارل شوه.
د یاد ښوونځي نوې ودانۍ په دوه نیم جریب ځمکه کې په پاخه او اساسي ډول د هندوستان هیواد په مالي مرسته د ۲۰ میلیونو افغانیو په مجموعي لګښت د یو کال په موده کې جوړه شوې، چې ۱۲ درسي ټولګي، ۴ اداري خونې، کمپیوټر لب، لابراتوار او نورې اړوندې ټولې آسانتیاوې لري.
په همدې تړاو جوړه شوې غونډه کې د پکتیکا ولایت مرستیال والي انجینر شیر پاد شاه ارګوني، دپوهنې رییس انجینر محراب الدین شفق، د ولایتي شورا یو شمیر وکیلانو، قومي مخورو، دیني علماوو، ځوانانو او د یاد ښوونځي ښوونکو ګډون درلود.
مرستیال والي په خپلو خبرو کې د ښوونځي د نوې ودانۍ د پرانېستو له امله د سیمې اوسېدونکو ته مبارکي وویله او له ولسونو یې وغوښتل، چې د خپلو ماشومانو د ښوونې او روزنې په برخه کې جدې هڅې وکړي.
د پکتیکا د پوهنې رییس د یادې سیمې خلکو ته ډاډ ورکړ، چې د اولادونو لپاره به یې د باکیفیته زده کړو اسانتیاوې برابرې او په دې برخه کې له پخوا هڅې ګړندۍ کړي دي. نوموړي په روان کال کې له معارف سره د ولس مرستې او همکارۍ وستایلې او په راتلونکي کې یې هم د ورته همکاریو غوښتونکی شو.
انجینر محراب الدین شفق هیله څرګنده کړه، چې په دې ولایت کې د پوهنې روان بهیر ورځ تر بلې د پرمختګ په حال کې دی او ددې پرمختګ لوی راز یې د ولسونو همکاري یاده کړه.
