د پوهنې وزارت سرپرستې د زابل له والي سره ولیدل
د پوهنې وزارت، کابل: د پوهنې وزارت سرپرستې آغلې رنګینې حمیدي د ښاغلې احمد ګل رسولي د زابل ولایت والي، ښاغلې عبدالقادر قلات وال او میرمن زهرا توخی د ولسي جرګې استازي، ښاغلې عطا جان حق بیان د ولایتي شورا رییس، ښاغلې کوچۍ د زابل ولایت د دفتر رییس، او ښاغلې سیال، د زابل ولایت له ویاند سره په خپل کاري دفتر کې ولیدل.
په دې غونډه کې، د زابل والي په یاد ولایت کې د پوهنې پرمختګ او ستونزو په ځانګړي ډول د درسي کتابونو نشتون، د ښوونځیو جوړول، د مسلکي ښوونکو کمبود او یو شمیر نورو مسایلو په اړه خبرې وکړې.
د پوهنې وزارت سرپرستې د زابل له والي څخه په یاد ولایت کې د پوهنې په برخه کې د سمون او پرمختګ په برخه کې د دوی د هڅو له امله مننه وکړه او زیاته یې کړه چې له بده مرغه په زابل ولایت کې لا هم د پوهنې په برخه کې ستونزې او خنډونه شتون لري ، خو د پوهنې وزارت په محرومو سیمو، په ځانګړي ډول په زابل ولایت کې د پوهنې د ستونزو او ننګونو حل ته ځانګړې پاملرنه کوي.
آغلې رنګینې حمیدي زیاته کړه چې د پوهنې وزارت هڅه کوي د ټولو لپاره په ځانګړي توګه د نجونو لپاره د غوره ښوونې او روزنې زمینه برابره کړي.
په پای کې ښاغلي احمد ګل رسولي د زابل ولایت والي د پوهنې وزارت له رهبرۍ مننه وکړه او ژمنه یې وکړه چې په هره برخه کې په تیره د ښوونې او روزنې په برخه کې هر راز همکارۍ ته چمتو دی.
