د کابل په انټر کانټينټال هوټل کې د دريو ورځو لپاره تعليمي، مسلکي او تحصيلي نندارتون پرانیستل شو

په دې نندارتون کې د پوهنې، لوړو زده کړو، اقتصاد، صنعت او تجارت وزارتونو او د تخنيکي او مسلکي زده کړو د ادارې، د چارو د ادارې د لوی رياست او د خصوصي ښوونځيو، مدارسو، پوهنتونونو او مخابراتي شبکو مسئولینو او استازو ګډون درلود.
 دغه نندارتون چې د حوت د مياشتې له 11 نېټې څخه پيل شوی، د همدې مياشتي تر 13 نېټې پورې به د دريو ورځو لپاره دوام ولري.
په دې نندارتون کې به د ټولو دولتي او خصوصي علمي مرکزونو کتابونه، مجلې، ليکلې مقالې او پرمختګونه نندارې ته وړاندې شي.
 د دې نندارتون اصلي موخه په ټولنه کې د علم او پوهې ارزښت رابرسېره کول دي. په دې نندارتون کې به د ټولو دولتي او خصوصي علمي بنسټونو استازي خپلې تجربې او معلومات سره شريک کړي.
د یادونې وړ ده، چې په دې نندارتون کې د پوهنې وزارت په استازیتوب د یاد وزارت د خصوصي زده کړو رئیس الحاج عبدالرحمن حمیدي ګډون لري.