له ولایتونو څخه د پوهنې خبرونه
نورستان
په نورستان کې د کوار مؤسسې د سیمه ییز دفتر استازو د دې ولایت د پوهنې له رئیس تاج محمد مطمئن سره د کتنې پر مهال د دې ادارې د ترسره شویو فعالیتونو، راتلونکو پلانونو په اړه معلومات ورکړل.
بل خوا د نورستان د پوهنې رئیس د دوی د پلانونو د عملي کولو په برخه کې د هر ډول مرستو ژمنه وکړه.
کابل
د کابل ښار د پوهنې ریاست د یو لړ شاندارو مراسمو په ترڅ کې د کابل ښار د بېلابېلو ښوونځیو د دولسمو ټولګیو۷۵۰ تنو فارغینو ته د فراغت شهادت پاڼې ووېشلې.
لغمان
د لغمان ولایت د پوهنې رئیس مولوي شاه جهان ساجد د دې ولایت په مرکز او ولسوالیو کې د ښوونکو د شورا له غړو سره وکتل.
په یو بل خبر کې؛ د الینګار ولسوالۍ د پوهنې آمریت په جوړه شوې غونډه کې له اړوندو مسئولینو سره پر پلانونو او ستونزو خبرې وشوې.
غزني
کوار مؤسسې د یونیسف ادارې په مالي مرسته د غزني ولایت پوهنې ریاست ته د سیمه ییزو زده کړو د ۱۲۰۰۰ زده کوونکو لپاره کتابونه او ښوونیز توکي وسپارل.
