له ولایتونو څخه د پوهنې څو لنډ خبرونه

کندهار

د کندهار ولایت د ۷ بابه لېسو آمرين، د ښوونیزو چارو د ښه تطبیق په موخه تغير او تبدیل شول. 
د يادولايت پوهنې رياست رهبري وايي: ياد بدلونونه د پوهنې چارو د ښه والي او د وزارت مقام په مشوره د ستونزو د حل په موخه ترسره شوي دي.

لوګر

د لوګر ولایت په محمدآغې ولسوالۍ کې د زده کوونکو د کورنیو او د ښوونځيو شورا غړو ۲۲۰ زره افغانۍ راټولې کړې او د يادې ولسوالۍ اړوند وحدت عالي لېسې لپاره یې، د لمریزې برېښنا سيستم فعال کړ.
 د يادې لېسې ادارې د محمداغې ولسوالۍ له علم دوستو خلکو څخه د دغه نېک اقدام له امله مننه وکړه او زياته يې کړه: دوى به له ورکړل شوې برېښنا څخه د کمپيوټر خونې په فعالولو او اداري چارو کې ګټه واخلي.

 ننګرهار

 د ننګرهار په خوګیاڼو ولسوالۍ کې یو شمېر علم دوسته خلکو په خپل شخصي لګښت، دخيرمني منځني ښوونځي ادارې سره يو پايه کمپيوټر له پرېنټر سره او د دغه مکتب د اوبو ذخيرې فعالولو لپاره لس زره افغانۍ نقده مرسته وکړه.
 د ننګرهار پوهنې ریاست د پوهنې د پرمختګ په برخه کې د خلکو له مرستو هرکلی وکړ.

 بلخ

 د لوړو زده کړو وزارت کانکور آزموینې کمیټې د نوم لیکنې ۵۳۳۹ کارتونه د بلخ ولایت پوهنې ریاست ته انتقال کړل او د ياد ولایت پوهنې له رئیس الحاج مولوي عبدالجلیل شهید خېل سره یې د کانکور آزموینې د ترسره کېدو څرنګوالي په اړه خبرې او مشورې وکړې.

پکتیا

د پکتيا ولايت پوهنې رئيس مولوي عبدالوکيل خالد، د باغ شاه، تيراه، ششغر، پيران او سيد حسن لېسو له اداري او تدريسي فعاليتونو څخه کتنه وکړه او د يادو لېسو ستونزې او اړتياوې يې واورېدې او د حل ژمنه يې وکړه.

پنجشېر

دپنجشېر ولايت پوهنې رئيس مولوي غلام ايشان حماس، د ياد ولايت مرافعې محکمې له رئيس مولوي عبدالله سديد سره يوځاى د ياد ولايت عنابه ولسوالۍ دشتک سيمې ته ولاړ او هلته يې له مرکزي جهادي ليسې څخه ليدنه وکړه.
پلاوي د يادې مدرسې له مهتمم شيخ مولوي مسيح الله  سره وکتل او د مدرسې پر لاسته راوړنو، ستونزو او ځينو اړينو موضوعاتو يې خبرې وکړې.
په پای کې د ستونزو د حل په موخه لازم تصميمونه ونيول شول.