له ولایتونو څخه د پوهنې لنډ خبرونه
ننګرهار
په ننګرهار ولایت کې د یوه مرستندویه بنسټ له لوري د یاد ولایت د بهسودو ولسوالۍ اړوند د قلعه جانان خان او ملکې ثریا لېسو د اوبو رسولو سیستم فعال اوګټې اخیستنې ته وسپارل شو.
د ننګرهار پوهنې رئیس مفتي حبیب حضرت حقاني، د یاد خیریه بنسټ له سخاوتمندانه مرستې څخه مننه او قدرداني وکړه.
د یو بل خبر له مخې:
د ننګرهار پوهنې رئیس د ملي بانک له استازو سره په لیدنه کې له دوی وغوښتل، چې د خصوصي مدارسو د استادانو او کارکوونکو د معاشونو په وېش کې د پوهنې ریاست سره همکاري وکړي،چې د مقابل لوري څخه ورسره د همکارۍ ژمنه وشوه.
له همدې ریاست څخه یو بل خبر:
د ننګرهار ولایت کانال ریاست ۱۶ تنه منسوبین د سواد زده کړې له ۹ میاشتني کورس څخه فارغ شول.
د یاد ولایت پوهنې ریاست د سواد زده کړې آمریت وایي: دوی په پام کې لري تر څو د ټولو ادارو خدمتي کارکوونکي د سواد زده کړې په پروګرامونو کې شامل کړي.
هلمند
د هلمند ولايت پوهنې رئيس الحاج مولوي محمد عوض انصاري د ياد ریاست له آمرینو، مديرانو او کارکوونکو سره د ليدنې پر مهال له هغوی وغوښتل، چې د نوي ښوونیز کال له پیل سره سم د زده کوونکو لپاره د باکيفيته ښوونيزو خدمتونو د وړاندې کولو په موخه منظم او اغېزمن پروګرامونه جوړ کړي.
کاپیسا
د کاپیسا ولایت پوهنې رئیس مولوي محمد فرید حقاني، د یاد ولایت شهر صفا ولسوالۍ د عبدالمبین شهید لېسې اداري او تدریسي چارې وارزولې او د ښوونیز وضعیت د لاښه والي په موخه یې مسؤلینو ته لازمې لارښوونې وکړې.
