له ولایتونو څخه د پوهنې لنډ خبرونه
هلمند
د هلمند ولایت پوهنې رئیس الحاج مولوي محمد عوض انصاري، د یاد ولایت د دیني مدارسو له مسؤلینو سره وکتل او د هغوی د فعالیتونو په اړه یې د پوهنې وزارت د لارښوونو پر عملي کولو ټینګار وکړ.
نوموړي له مسئولینو وغوښتل، چې د زده کړو د کيفيت په لوړولو او د زده کوونکو په سالمه ښوونه او روزنه کې لازیاتې هلې ځلې وکړي.
پکتيکا
د پکتیکا ولایت پوهنې رئیس الحاج مولوي عبدالقیوم فاروقي، د یحی خېلو ولسوالۍ د یو شمېر ښوونځیو له کړنو څخه څارنه وکړه او له ښوونکو یې وغوښتل، چې د زده کوونکو سالمې ښوونې او روزنې ته د پخوا په پرتله لا زیاته پاملرنه وکړي.
غزني
د غزني ولایت پوهنې ریاست د یاد ولایت په لرې پرتو او محرومو ښوونځیو کې د یو شمېر ښوونکو د ګمارلو په موخه، ډله ییزه آزموینه واخیسته.
کابل
د کابل ښار پوهنې ریاست، د بېلابېلو ښوونځیو ۶۸۳ تنو زده کوونکو ته په انفرادي ډول د دولسمو ټولګيو شهاتنامې ووېشلې.
د یاد ښار پوهنې رئیس حافظ عبدالباسط حقاني، د پوهنې پر ارزښت خبرې وکړې او د شهادتنامو د وېش په اړه یې ګډون والو ته معلومات ورکړل.
ننګرهار
د ننګرهار ولایت پوهنې ریاست د نتایجو او شهادتنامود مدیریت په برخه کې د ۵ قراردادي کارکوونکو د ګمارنې په موخه، له ۴۵ تنو نوماندانو څخه آزموینه واخیسته، چې له ډلې به یې ۵ تنه وړ کسان په یادو بستونو کې وګمارل شول.
