د ولایتونو له پوهنې ریاستونو څخه لنډ خبرونه

هلمند
د هلمند ولايت پوهني رياست د یوې ډله ییزې آزمويني په ترڅ کي، له ۶۵۸ تنو نوماندانو څخه آزموينه واخيسته، تر څو  د یاد ولايت په مرکز او ولسواليو اړوند دیني مدارسو کې وړ کسان د استادانو په توګه و ګمارل شي.

بلخ
د بلخ ولایت پوهنې رئیس الحاج مولوي عبدالجلیل شهیدخېل د یاد ولایت د جهادي مدرسې د څلور نیم میاشتنیو آزموینو څخه څارنه وکړه.
نوموړي په ياده مدرسه کې د آزموينو پر روڼتيا ټينګار وکړ او مسئولينو، استادانو او زده کوونکو ته يې لازمې لارښوونې وکړې.

هرات
د هرات ولایت پوهنې ریاست د یو لړ مراسمو په ترڅ کې، د سلطان غیاث الدین غوري لېسې د زده کوونکو په منځ کې د ښاروالۍ کمېټه جوړه او خپل فعالیت یې پیل کړ.
د هرات پوهنې رئیس ډاډ ورکړ چې د یادې کمېټې د فعالیتونو په پیلېدو سره به د ښوونځیو د چاپېریال ساتنې او پاکوالي په برخه کې ښه والی رامنځ ته شي.

غزني
د غزني ولایت پوهنې رئیس الحاج مولوي میرنصیر احمد حسیني او ورسره مل پلاوي، تېره ورځ د یاد ولایت د جهادي مدرسې له څلورنیم میاشتنیو آزمونیو څخه د څارنې پر مهال، د یادې دیني مدرسې شته ستونزې وڅېړلې او د حل ژمنه یې وکړه.

لوګر
د لوګر پوهنې ریاست د بدني روزنې مدېریت د یاد ولایت د ۱۲ دولتي او خصوصي عالي لېسو د کرېکټ لوبډلو ترمنځ سیالۍ پیل کړې، چې موخه یې د ښوونځیو د غوره لوبډلو ټاکل دي.
په پای کې د لوګر پوهنې ریاست له لوري پر یو شمېر لوبغاړو ستاینلیکونه ووېشل شول.