په هلمند ولایت کې د یو دارالعلوم د ودانۍ بنسټ ډبره کېښودل شوه
د هلمند ولایت په سنګین ولسوالۍ کې د پوهنې ریاست د مشرتابه پلاوي، د ملکي او نظامي ادارو د مسئولینو، دیني علماوو او مشرانو په ګډون د یو لړ شانداره مراسمو په ترڅ کې، دارالعلوم محمودیه د بنسټ ډبره کېښودل شوه.
یاد دارالعلوم په لس نيم جرېبه ځمکه کې جوړيږي چې ځمکه یې د دغه ولايت د يو تن ملي سوداګر حاجي سيف الله له لوري ورکړل شوې ده.
په ورته مهال د یاد دارالعلوم د ودانۍ لګښت ۴۰۰ زره امریکايي ډالره اټکل شوی، چې د یاد ولایت د یو بل ملي سوداګر حاجي نظر محمد اکا له لوري ورکول کیږي.
د یاد دارالعلوم مسئول مولوي فدا محمد منصور وايي: دغه دارالعلوم به په دوو پوړونو کې چې د ۳۵۰ زده کوونکو ظرفیت به ولري په پاخه او اساسي ډول جوړ شي، چې د يو جومات سربېره به د مطالعې لپاره شنه سیمه او تفريحي ځايونه هم ولري.
د هلمند پوهنې رئيس مولوي محمد عوض انصاري، د هېواد د پوهنې له نظام سره د د یادو سوداګرو له مرستو د مننې او هرکلي په ترڅ کې زياته کړه، د دغه ديني مرکز د جوړېدو چارې به د هلمند پوهنې رياست د انجنيري ټېم له لوري پلې شي.
