له ولایتونو څخه د پوهنې څو خبرونو ته کتنه
![fg](/sites/default/files/2023-10/whatsapp_image_2023-10-26_at_12.16.51_pm.jpeg)
غزني
د پوهنې وزارت د څارنې او ارزونې ریاست پلاوي غزني ولایت ته د یو رسمي سفر په ترڅ کې، د یاد ولایت د جاغوري ولسوالۍ پوهنې آمریت اړوند د عبدالغفور سلطاني، شهدای مکران، نور او شمس آب بورده د ښوونځیو اداري او تدریسي چارې وڅېړلې، د ښوونکو د تدریس طریقې او د زده کوونکو د زده کړې کچه یې هم له نیږدې وارزوله.
دایکنډي
د پوهنې په برخه کې د یوه همکار بنسټ استازو، د دایکنډي ولایت له پوهنې رئیس قاري عنایت الله سهار سره وکتل او د یاد ولایت له پوهنې مشرتابه سره یې د همکارۍ ژمنه یو ځل بیا تازه کړه.
د یو بل خبر له مخې:
د دايکنډي ولايت د اشترلي ولسوالۍ يو شمېر قومي مشرانو د یاد ولايت له پوهنې رئيس سره وکتل، د پوهنې په برخه کې يې د یاد رياست د رهبرۍ له هڅو ستاينه وکړه او د دايکنډي له پوهنې برخې سره يې خپله همکاري او ملاتړ اعلان کړ.
ننګرهار
د ننګرهار ولایت پوهنې رئیس مفتي حبیب حضرت حقاني د یاد ولایت دور بابا ولسوالۍ د بندر پائین منځني ښوونځي له چارو څخه څارنه وکړه.
نوموړي د یاد ښوونځي د اداري او تدريسي اسنادو د څېړلو پر مهال، زده کوونکي دیني او عصري زده کړو ته متوجه، او استادان يې د هېواد بچيانو ته د خدمت په موخه وهڅول.
همدارنګه:
د ننګرهار ولايت په مرکز جلال آباد ښار کې د ميا عمر او ننګرهار لېسو د سپورتي لوبډلو ترمنځ د باسکټبال سيالۍ ترسره شوې، چې د دواړو لوبډلو ترمنځ په مساوي توګه پای ته ورسېدې.
د یاد ولایت پوهنې رياست، غوره لوبغاړي په ستاینلیکونو وویاړل.