په دايکنډي ولايت کې دوه بابه ديني مدارس فعال او ځمکه ورته ځانګړې شوه
د دايکنډي ولايت د پوهنې دوستو خلکو، د یاد ولايت پاتو ولسوالۍ د تمزان او قاخور په کليو کې د دوه بابه ديني مدارسو د جوړولو لپاره ځمکه ورکړه او د پوهنې له رياست څخه يې وغوښتل، تر څو د دغو دوو مدارسو زده کوونکو لپاره ودانۍ جوړې کړي.
د پوهنې رئيس قاري عنايت الله سهار، له ولسونو څخه د ښوونې او روزنې د دوستۍ له امله د مننې ترڅنګ څرګنده کړه، چې د ديني مدارسو په جوړولو او تر میمولو کې مرسته کول يو له صدقه جاریه کارونو څخه دي او له نورو شتمنو هېوادوالو يې وغوښتل، تر څو په دې برخه کې خپله ونډه واخلي.
دغه راز نوموړي ژمنه وکړه، چې د ملي سوداګرو او د پوهنې له بودیجې څخه به د یادو مدارسو لپاره د ودانیو په جوړولو کې هڅې وکړي.
د يادونې وړ ده، د دغو مدارسو لپاره د ځمکې له ورکړې سره سم د پوهنې رياست له لوري د نويو زده کوونکو د نوم ليکنې لړۍ هم پيل شوه او ټاکل شوې ده، چې د مدارسو لپاره د نویو ودانیو تر جوړېدو پورې به په موقتي ټولګيو کې خپلو زده کړو ته دوام ورکړي.
