له مرکز او ولایتونو څخه د پوهنې لنډ خبرونه
لوګر
لوګر ولایت کې د پوهنې دوو تنو دوستو شخصیتونو هریو انجنیر محمد همایون عباسي او خواجه محمد احمد ملک، د یاد ولایت مرکز پل علم ښار کې د شش قلعه منځني ښوونځي لپاره د پنځوس زره افغانیو په ارزښت د کمپیوټر ، پرنټر او د اوبو پمپ مرسته وکړه.
د لوګر پوهنې ریاست د دوی له دغه نېک احساس څخه مننه او قدرداني وکړه.
کابل
د کابل ولایت پوهنې رئیس مولوي عبدالحق حقاني له خپل مل پلاوي سره د یوه کاري سفر په ترڅ کې، د یاد ولایت میربچه کوټ ولسوالۍ د پوهنې آمریت، د شیخان او نمبر یک میر بچه کوټ ښوونځيو اداري او تدریسي اسناد وڅېړل.
ننګرهار
د ننګرهار ولایت پوهنې ریاست د ښوونکو ۳۷ خالي بستونو د ډکولو په موخه، له ۳۱۳ تنو نوماندانو څخه د آزاد رقابت آزموینه اخیستې؛ تر څو وړ کسان د اچین ولسوالۍ په ښوونځیو کې د ښوونکو په توګه وګماري.
پکتیا
د پکتيا ولايت پوهنې رياست ۱۳ کمپيوټرونه او ۵ پرنټرونه چې بې کاره وو ترميم او د یاد رياست په څانګو کې یې د ګټې اخيستنې لپاره ووېشل.
ننګرهار
د ننګرهار ولايت پوهنې رئيس مفتي حبيب حضرت حقاني، د یاد ولايت مرکز اړوند ننګرهار عالي لېسې د آزموينې بهیر، اداري او تدريسي چارو څارنه وکړه او د ښوونیز حالت لاښه والي او په آزموينو کې د روڼتیا په موخه یې مسئولینو ته لازمې لارښوونې او مشورې ورکړې.
