د مرکز او ولایتونو له پوهنې کړنو انعکاس
لوګر
د لوګر ولایت په محمدآغې ولسوالۍ کې د پوهنې یوې دوستې کورنۍ له خپلو شخصي شتمنیو څخه د ۹۵ زره افغانیو په لګښت، د «کارېز دولت» ښوونځي ته د څښاک پاکو اوبو څاه وکینده.
د لوګر پوهنې ریاست له دغه بااحساسه کورنۍ څخه مننه او قدرداني وکړه.
کابل
د قومونو او قبايلو چارو وزارت د مشرتابه له لوري، د کابل ښار پوهنې رئیس قاري عبدالباسط حقاني او د درېيمې ناحيې اړوند آمرین د پوهنې په برخه کې د ارزښتناکو خدمتونو له امله په ستاينليکونو وستايل شول.
په هغو مراسمو کې چې د کابل ښار پوهنې رياست تالار کې نیول شوي وو، پکې د قومونو او قبایلو چارو وزارت مسئولینو د پوهنې ریاست د مشرتابه کړنې وستایلې او هغوی ته یې د لابرياوو هيله وکړه.
په پای کې د کابل ښار پوهنې رئیس د قومونو او قبايلو چارو له وزارت څخه مننه او قدرداني وکړه.
غزني
د غزني ولایت پوهنې رئیس الحاج مولوي میر نصیر احمد حسیني، د یاد ولایت زنخان ولسوالۍ د سیمه ییزو ادارو له مسئولینو سره وکتل او د یو شمېر مدارسو اداري او تدریسي چارې یې له نیږدې وڅېړلې.
بدخشان
دبدخشان ولايت پوهنې رياست د .ا.ا. له ۱۰۳۰ تنو م/جاهدینو څخه کوم چې د جهادي فعالیتونو له امله له زده کړو څخه پاتې شوي وو، ښوونځیو ته د هغوی شاملولو په موخه، د سویې د تثبیت آزموینه واخیسته.
دایکنډي
د دایکنډي ولایت پوهنې ریاست د ولسوالیو ښوونکو او د پوهنې مدیرانو لپاره دوه ورځنی روغتیايي سیمینار دایر کړ.
د دايکنډي پوهنې رئيس قاري عنايت الله سهار وويل، چې د دغه سیمینار له ترسره کېدو يې موخه، د پوهنې د مديرانو او ښوونکو له لارې په ټولنه کې د نظافت فرهنګ رواجول دي.
