په لوګر ولايت کې یو باب ديني مدرسه پرانیستل شوه
د لوګر ولایت مرکز پل علم ښار اړوند د غیرت آباد په کلي کې، د "دار القرآن حاجي منګل احمدزي" د ښځینه وو مدرسه د یو لړ مراسمو په ترڅ کې، چې پکې د پوهنې مسئولینو، دیني علماوو او قومي مشرانو ګډون درلود، تاسیس او ګټې اخیستنې ته وسپارل شوه.
یاده دیني مدرسه چې په یو وخت د ۶۰۰ تنو زده کوونکو ظرفیت لري، د لوګر ولایت د پوهنې دوست شخصیت «حاجي محمد اکبر اتل» له لوري جوړه شوې ده.
په دې مدرسه کې د ديني علومو پر تدريس سربېره د عصري علومو مضمونونه هم تدريس او چارې یې د شپږو تنو ښځینه وو استادانو له لوري پر مخ وړل کېږي.
دغه راز په یاده مدرسه کې د درسي ټولګيو له پيل سره سم پر زده کوونکو د ۵۰۰ زره افغانيو په ارزښت د قرآن کريم نسخې، ديني کتابونه، درسي بکسونه، او ژمنۍ جامې هم ووېشل شوې.
د پوهنې ریاست مسئولینو او دیني علماوو په خپلو خبرو کې د دغه بااحساسه علم پال شخصیت له مرستو مننه وکړه او د دا ډول مقدسو ځایونو جوړول یې د صدقه جاریه اعمالو څخه وبلل.
د سيمې اوسېدونکو هم په خپل کلي کې د يادې مدرسې پر جوړېدو خوښي څرګنده او ژمنه يې وکړه، چې خپل اولادونه به د زده کړو په موخه دغه ديني بنسټ ته ولېږي.
