د ولایتونو له پوهنې ډګره څو لنډ خبرونه
کاپیسا
د کاپيسا ولايت پوهنې رئيس مولوي محمد فريد حقاني د تګاب ولسوالۍ د ديني مدارسو له استادانو او مسئولينو سره د ليدنې پر مهال، د پوهنې وزارت د نصاب پر بشپړ پلي کېدو ټينګار وکړ او د ښوونیز کیفیت لوړولو برخه کې يې لازمې مشورې او لارښوونې وکړې.
همدارنګه
د پوهنې په برخه کې یو همکار بنسټ، د کاپیسا ولایت د پوهنې ریاست سره په همغږۍ، د سیمه ییزو او چټکو زده کړو د ۶۱ تنو ښوونکو لپاره لس ورځنی میتودیک سیمینار جوړ کړ.
پکتیا
د پکتیا ولایت پوهنې رئیس مولوي عبدالوکیل خالد د ابرار ښوونیز بنسټ د ساحوي دفتر له استازي سره وکتل.
په یاه کتنه کې دواړو لوریو د همکاریو د دوام او د ښوونیزو پروګرامونو د لاپیاوړتیا په اړه بحث او خبرې وکړې.
بدخشان
د بدخشان ولايت د اطلاعاتو او فرهنګ رئيس انجنير ذبېح الله اميري،د یاد ولايت د پوهنې له نوي رئيس مولوي نصرت الله فيضاني سره وکتل او د دواړو ادارو پر دوامداره همکاريو يې ټينګار وکړ.
هلمند
د هلمند ولایت پوهنې ریاست روزونکو د یاد ولایت په موسی قلعه ولسوالۍ کې د ۳۵ بابه مدارسو او دارالحفاظونو د استادانو او زده کوونکو لپاره یو ورځنی ښوونیز او مسلکي سیمینار جوړ کړ.
