په کونړ ولایت کې د ۱۱ مېلیونه افغانیو په ارزښت د یو ښوونځي د ودانۍ رغولو چارې پیل شوې
د کونړ ولایت څوکۍ ولسوالۍ اړوند " په زوړ کلي کې" د یو باب لومړني ښوونځي د ودانۍ بنسټ ډبره کېښودل شوه.
به یادو مراسمو کې د کونړ ولایت د مقام مرستیال الحاج مولوي عبدالله حقاني، پوهنې رئیس مولوي محب الله حیدري، علماء کرامو او د خلکو استازو حضور درلود.
ټاکل شوې ده، د ښوونځي دغه ودانۍ په ۱.۵ جرېبه ځمکه کې د پوهنې سره د همکار بنسټ په مالي مرسته جوړ شي، چې ۴ درسي ټولګي، دوه اداري خونې او نور اړین ملحقات به ولري.
د پوهنې رياست د مسئولينو په وينا، د یاد ښوونځي په جوړېدو سره به د زوړ کلي ۳۳۰ تنو ماشومانو ته د زده کړو زمينه برابره شي.
د ياد کلي اوسېدونکو په خپله سیمه کې د ښوونځي پر جوړېدو خوښي څرګنده او د پوهنې وزارت له مشرتابه يې مننه او قدرداني وکړه.
