د پوهنې وزارت د معیاري آزموینو او ښوونیزو پایلو ارزونې رئیس د ننګرهار او کونړ ولایتونو له ښوونځیو څخه ارزونه وکړه
د پوهنې وزارت د معیاري آزموینو او ښوونیزو پایلو ارزونې رئیس مولوي شمس الرحمن «حماس»، ننګرهار او کونړ ولایتونو ته د خپل رسمي سفر په ترڅ کې، د یادو ولایتونو له پوهنې رئیسانو، مسئولینو او د اصول صنفي ټولګیو ارزونې مؤظفو ټیمونو سره وکتل.
ورپسې نوموړي د کونړ ولایت کوز کونړ ولسوالۍ اړوند توکل بابا، سید احمد بابا، یاسین بابا لېسو او د ننګرهار ولایت د کامې او بهسود ولسوالیو د شیګړ او محمدي صاحبزاده لېسو ښوونیز او روزنیز وضعیت له نږدې څخه وڅاره.
د پوهنې وزارت د معیاري آزموینو او ښوونیزو پایلو ارزونې رئیس د یادو ښوونځیو د اصول صنفي ټولګیو د تعلیمي وضعیت ارزونې سربېره، اړونده مسئولین خپلو اساسي مسئولیتونو ته متوجې کړل او له هغوی یې وغوښتل چې د هېواد بچیان په بشپړه اسلامي او ملي روحیه وروزي، ترڅو هغوی په راتلونکي کې د هېواد د هر اړخیز پرمختګ او ترقۍ لپاره د صادقانه خدمت کولو جوګه شي.
په ورته وخت کې د یادو ولایتونو پوهنې مسئولینو پلاوي ته د هرکلي ترڅنګ، خپلې ځینې ستونزې او وړاندیزونه وړاندې کړل، چې د پوهنې وزارت د معیاري آزموینو او ښوونیزو پایلو ارزونې رئیس له لوري ورسره د ښوونیزو پروګرامونو د پلي کولو او همکارۍ ډاډ ورکړل شو.
