د کابل ښار د ښوونځیو له مدیرانو سره علمي او مسلکي ناسته ترسره شوه
د کابل ښار پوهنې ریاست لخوا د ښوونیزو چارو لا ښه تنظیم، د تعلیم کیفیت لوړولو، اداري چارو د پیاوړتیا او د ښوونځیو د مدیریت د اغېزمنتیا زیاتولو په موخه، د ښار د ۱۶ ګونو ښوونیزو ناحیو د ښوونځیو له مدیرانو سره یوه پراخه علمي، مسلکي او روزنیزه ناسته د یاد ریاست په تالار کې ترسره شوه.
دغه ناسته د دې لپاره جوړه شوې وه چې د پوهنې په برخه کې فرصتونه، ستونزې، لاسته راوړنې او راتلونکي پلانونه وڅېړل شي، چې پکې د پوهنې وزارت مسوولینو، د کابل ښار پوهنې ریاست مرکزي مدیرانو او د ښوونیزو حوزو د ښوونځیو مدیرانو ګډون درلود.
په پیل کې د کابل ښار پوهنې رئیس مولوي حسیبالله صاحبزاده د پوهنې وزارت د ښوونې او روزنې د معین شیخ عبدالمالک حقاني، د غونډې مېلمنو او ګډونوال هرکلی وکړ او د علم او پوهې پر اهمیت یې خبرې وکړې.
نوموړي وویل چې ښوونه او روزنه د هرې ټولنې د پرمختګ، سوکالۍ او فکري ودې بنسټ جوړوي او د یو بریالي او پرمختللي ښوونیز نظام لپاره د ښوونځیو مدیران، ښوونکي او تعلیمي برخې مسوولین مهم رول لري.
ورپسې د پوهنې وزارت د ښوونې او روزنې معین شیخ عبدالمالک حقاني د اسلامي او عصري علومو پر اهمیت، د سالم تفکر ترویج، د اسلامي ارزښتونو پیاوړتیا او د تعلیمي نظام د لا ښه والي په اړه تفصیلي خبرې وکړې او ویې وویل چې د علم رڼا د ټولنې د پرمختګ او اصلاح تر ټولو مهمه وسیله ده او د پوهنې برخه کې د هېواد د راتلونکي نسل د روزنې لوی مسوولیت پر غاړه لري.
هغه د ښوونځیو مدیران د تعلیمي نظام مهم محورونه وبلل او ټینګار یې وکړ چې هغوی باید د ښوونیز چاپېریال د ښه والي، د ښوونکو د فعالیت منظمې څارنې او د زدهکوونکو د علمي کچې لوړولو لپاره نه ستړې کېدونکې هڅې وکړي.
