په کابل ښار کي د عزیر ۲ نمبر خصوصي ښوونځي زده کوونکو د ټپي کیدو په اړه د پوهنې سرپرست وزیر ډاکتر محمدمیرویس بلخي پيغام
په ډیره خواشیني سره مي خبر تر لاسه کړ چي د نن ورځي چاودنه چي د کابل ښار په ۸ ناحیه کي وشوه یو شمیر درانه هیوادوال چي د هغو له جملي څخه ۵۰ تنه يي د عزیر دوهم نمبر خصوصي ښوونځي زده کوونکي وو د کابل ښار غازي ستدیوم په سیمه کي زخمي شوي دي.
ترلاسه شوي راپورونه ښیي چي له نیکه مرغه د یادو زده کوونکو روغتیايي حالت د اندیښني وړ ندی.
زه د ښووني او روزني مسئول او د پوهنې ستري کورني په استازيتوب هغو زده کوونکو ته چي د نن ورځي په پيښه کي زخمي شوي د الله (ج) څخه ورته د بشپړي روغتیا دعا کوم او د زده کوونکو کورنیو په درد کي ځان شریک بولم.
په همدې وخت کې غواړم د روغتیایي مرکزونو ډاکترانو له پاملرني څخه مننه وکړم او له هغوی څخه هیله کوم تر څو د زده کوونکو او ماشومانو درملني ته ځانګړي پاملرنه وکړي.
ډاکترمحمدمیرویس بلخي
د پوهنې سرپرست وزیر
