پوهنې وزیر ډاکتر بلخي د کابل ښار افغان- سویس ۲ نمبر خصوصي لیسې څخه لیدنه وکړه
پوهنې وزارت- کابل: پوهنې وزیر ډاکتر محمدمیرویس بلخي د افغان- سویس ۲ نمبر خصوصي لیسې څخه د لیدنې په ترڅ کې ټينګار وکړ چې د پوهنې وزارت لپاره دولتي او غیر دولتي ښوونځي یو شان ځای لري.
پوهنې وزیر د یادې لیسې له ټولګیو څخه د لیدنې ترڅنګ له زده کوونکو سره د غوره او مسلکي راتلونکي لپاره د زده کړې او تصمیم نیونې اهمیت په اړه خبرې وکړې.
پوهنې وزیر ډاکتر بلخي څرګنده کړه چې د افغانستان د ژغورنې یواځینۍ لار د سواد زده کړه ده او د همدې په موخه له زده کوونکو څخه یې وغوښتل چې په خوښۍ، زړورتیا او هوښیارۍ د ښوونې او روزنې لاره غوره کړي.
په دې لیدنه کې د یادې لیسې مدیر، ښوونکو او زده کوونکو، خصوصي ښوونځيو ته د پوهنې وزیر له پاملرنې څخه ستاینه وکړه او د پوهنې وزیر سره یې خپلې ستونزې شریکې کړې.
د یادونې وړ ده چې د افغان- سویس ۲ نمبر خصوصي ښوونځۍ د کابل ښار په ۱۷ تعلیمي حوزه کې موقعیت لري او د ۳۰۰ شااوخوا نجونې او هلکان زده کوونکې په کې زده کړه کوي.
