د لغمان ولایت د پوهنې ریاست نوې ودانۍ د پوهنې وزیر په شتون کې ګټې اخیستنې ته وړاندې شوه
پوهنې وزارت- لغمان: د لغمان پوهنې ریاست نوې ودانۍ د پوهنې وزیر ډاکتر محمدمیرویس بلخي، د کلیو پراختیا او بیارغونې وزیر مجیب الرحمن کریمي او ورسره مل پلاوو له لوري د پرانستلو ترڅنګ ګټې اخیستنې ته وړاندې شوه.
دا پرانسته لغمان ولایت ته د پوهنې وزیر د یوه ورځني سفر په لړکې تر سره شوه.
پوهنې وزیر د لغمان پوهنې ریاست نوي اداري کمپلکس په پرانسته کې وویل چې دا ودانې ۳۲ اداري خونې لري چې د دولت د ۲۵ میلیونه افغانیو پراختیایي او عادي بودجې څخه جوړه شوي ده.
د یادونې وړ ده چې پوهنې وزیر په ټول افغانستان کې د یوه معیاري ښوونې او روزنې جوړلو په لاره کې ولایتونو ته سفر کوي او له نژدې د ښوونې او روزنې حالت څیړې.
