پوهنې وزارت او د پلچرخي مرکزي زندان یو هوکړه لیک لاسلیک کوي.
پوهنې وزارت ــ کابل: پوهنې وزیر ډاکتر محمدمیرویس بلخي او د پلچرخي د مرکزي زندان رئیس مل پاسوال اختر محمد نورزوي ترمینځ په یوه ګډه لیدنه کې، د همکاریو د هوکړه لیک لاسلیکولو په اړه خبرې اترې وکړې.
دا لیدنه چې د پوهنې وزارت په کوربتوب ترسره شوه، په پلچرخي زندان کې د یوې لیسې د جوړولو، د پلچرخي زندانیانو حرفوي فعالیتونو لکه د میز او څوکیو جوړولو لپاره د بازار څخه د ګټه اخیستلو او د سواد زده کړو کورسونو او درسي ټولګیو د جوړولو په اړه خبرې اترې وشوې.
پوهنې وزیر وویل چې د پوهنې وزارت او پلچرخي زندان ترمینځ دوه اړخیزې همکارۍ به د هوکړه لیک په لاسلیکولو پیاوړې شي.
د پلچرخي زندان رئیس مل پاسوال اختر محمد نورزوی هم په دې لیدنه کې وویل چې د پلچرخي په مرکزي زندان کې ۸۹۰ زده کوونکي په ۸ کورسونو او ۲ وختونو کې په مختلفو مضمونونو کې روزل کیږي.
د پلچرخي مرکزي زندان رئیس په توقیف خونو او زندانونو کې د سواد زده کړې پراختیا په برخو کې د پوهنې وزارت له همکاریو څخه ستاینه وکړه.
