د کنړ د ښځینه ښوونکو د مسلکي روزنې دوه کلن پروګرام پیل شو
د پوهنې وزارت_کنړ: د کنړ ولایت په عالي دارالمعلمین کې د یونسیف په همکارۍ د ښځینه ښوونکو د مسلکي روزنې دوه کلن پروګرام پیل شو.
په همدغه تړاو په جوړ شویو مراسمو کې د کنړ والي محمد اقبال سعید سربېره د پوهنې رئیس مجیب الرحمن همدرد، د دولتی ادارو یو شمیر مسوولینو او ښوونکو ګډون درلود.
د پوهنې رئیس مجیب الرحمان همدرد وویل، یاد پروګرام یې په ښوونځیو کې د ښځینه مسلکي ښوونکو د کمبود ستونزې اوارۍ لپاره مهم یاد کړ او د یونسیف ادارې څخه د مننې ترڅنګ له محصلینو وغوښتل، چې روزنیز پروګرامونه جدي تعقیب کړی.
د پوهنې رییس زیاته کړه: د یاد پروګرام له مخې د مرکز په ګډون، شیګل، مرورې، نرنګ او وټه پور ولسوالیو کې ۸۰ تنه ښوونکې روزل کیږي چې د هڅونې په موخه محصلینو ته د ترانسپورټ او قرطاسیې اسانتیاوې هم په نظر کې نیول شوي او ښوونکو ته یې هم امتیاز ورکول کیږي.
د کنړ والي محمد اقبال سعید وویل ښوونکی په ټولنه کې لوی مقام او منزلت لري او د ولایت مقام به یې د ستونزو اوارۍ ته کلکه پاملرنه وکړي.
هغه د یونیسف ادارې څخه د مننې ترڅنګ وغوښتل، چې د ښوونکو د روزنې دغه پروګرام دوامداره کړي، ترڅو د مسلکي او په ځانګړي توګه د ښځینه ښوونکو د کمبود ستونزه اواره او د غوره زده کړو ترلاسه کولو فرصتونه رامنځته شي.
همداراز د کنړ عالي دارالمعلمین رئیسې آغلې فضیلې مروت د څرګندونو په مهال د ښوونکو روزنیز پروګرام بریالی وباله او ډاډ یې څرګند کړ، چې محصلینو ته به غوره زده کړه ییز چاپیریال رامنځته کړي.
هغې وویل د عالي دارالمعلمین په چوکاټ کې تر دې مهاله په بېلابېلو څانګو کې ۵۵۳۳ ښوونکي روزل شوي او ۹۶۸ نور د روزنې لاندې دي.
