په کندهار کې د نجونو یو ښوونځۍ پرانیستل شوه او د یو ښوونځی دبنسټ ډبره کیښودل شوه
د پوهنې وزارت، کندهار: د کندهار ولایت د مرکز اړوند د شهید عظیم الله د نجونو د ښوونځي نوې ودانۍ پرانیستل شوه او د شهید عبدالله لومړنۍ ښوونځي د نوې ودانۍ د بنسټ ډبره کیښودل شوه.
په هغه غونډه کې چې په همدې موخه جوړه شوې وه، مرستیال والي فیصل شیرزي، د پوهنې رییس پوهنیار محب احمد روښان، د ملګرو ملتونو د کډوالو اداري مسؤل تکاشی مور بیاما، د دولتي ادارو یو شمیر مسوولینو، قومی مشرانو او زده کوونکو ګډون درلود.
د پوهنې رییس پوهنیار محب احمد روښان په وینا د د شهید عظیم الله د نجونو ښوونځي ودانۍ په پاخه او اساسي ډول په دوو پوړنو کې د ۸ میاشتو په موده کې ۱۰۸ زره امریکایي ډالرو په مجموعي لګښت د ملګرو ملتونو د کډوالو چارو ادارې (UNHCR) په مالي مرسته جوړه شوي، چې ۸ درسي خونې، ۲ اداري خونې، تشنابونه د زده کوونکو لپاره میز او څوکۍ، د پاکو اوبو څاه او نورې اړینې اسانتیاوي لري.
همدارنګه د شهید عبدالله لومړنۍ ښوونځي ودانۍ په پاخه او اساسي ډول د ملګرو ملتونو د کډ والو چارو ادارې (UNHCR) په مالي مرسته د ۳۴۰ زرو ډالرو په مجموعي لګښت د یو کال په موده کې جوړیږي، چې ۱۲ درسي خونې، ۲ اداري خونې، د زده کوونکو لپاره میز او څوکۍ، د پاکو اوبو څاه او نوري اړوندې آسانتیاوي به ولري.
د یادونې وړ ده چې د ښوونځي د بنسټ ایښودلو په غونډه کې، مرستیال والي فیصل شیرزی، د پوهنې رییس پوهنیار محب احمد روښان او د ملګرو ملتونو د ادارې مسوول هر یو د تعلیم او روزنې ګټې او په خاص ډول د نجونو د تعلیم په اړه خبرې وکړې او د سیمې له اوسیدونکو یې وغوښتل چې خپل ماشومان په ښوونځیوکې شامل کړي .
