د څوارلسم پاسه ښوونکو د لیسانس دورې زده کړې پیل شوې
پوهنې وزارت، بدخشان: د بدخشان پوهنتون ښووني او روزوني پوهنځي کې د څوارلسم پاسه ښوونکو د لیسانس دورې زده کړې د یاد ولایت د پوهنې رئيس ډاکټر روح الله محقق، د پوهنتون رئیس، مرستیالانو او یو شمیر ښوونکو په شتون کې پيل شوې.
د بدخشان ولایت د پوهنې رئیس، ښوونې او روزنې ته د دولت او د پوهنتون د مشرتابه له پاملرنې مننه او قدرداني وکړه او وې ویل: د دې برنامې پیل د بدخشان ولایت ښوونکو او د ښوونې او روزنې کورنۍ لپاره خورا مهم او ارزښتناک ګام دی چې موخه یې زده کوونکو ته د معیاري تدریس میتودونو ښوول او د ښوونکو د مسلکي پوهې کچې لوړول دي.
نوموړي وویل: ښوونکي نه یوازې د اکاډمیکو سندونو ترلاسه کولو په مقصد پوهنتون کې شامل شوي ، بلکې ترڅنګ يې د پوهنتون د استادانو له علمي سرچینو هم پوره ګټه ترلاسه کوي.
همدارنګه د پوهنتنون رئیس محمد قاسم آریا او د ښوونې او روزنې پوهنځي رئیس جنید الله صبوریار د موضوع په اړوند خبرې وکړې او زیاته یې کړه، چې یاد پوهنتون د ښوونکو د ظرفیت لوړولو په برخه کې هر راز همکارۍ ته چمتو دی او په دې برخه کې د پوهنې ریاست د برنامو له پلي کیدو ملاتړ کوي .
د یادونې وړ ده، چې د څوارلسم پاسه ښوونکو لپاره د لوړو زده کړو دوام د پوهنې ریاست او د بدخشان پوهنتون ترمینځ د هوکړه لیک له مخې د اوړي او ژمي په دوه فصلونو کې له اته زرو څخه زیات ښوونکي او کارکوونکي په بیلابیلو څانګو کې مسلکي زده کړې کوي. چې په لومړي پړاو کې ، د مرکز د ښوونځیو ۲۶۸ ښوونکو شامل او په رسمي ډول یې زده کړې پیل کړئ.
