پکتیا کې بیرته راستانه شويو کډوالو څخه د تعليمي کچې د تثبیت آزموینه واخیستل شوه
پوهنې وزارت، پکتیا : د پکتيا پوهنې رياست له لورې له یو شمیر بیرته راستانه شویو کډوالو څخه د تعليمي کچې د تثبیت آزموينه واخيستل شوه.
یادې آزمویني څخه د څارنې په موخه د پوهنې رياست تدريسې مرستیالې روحانيه سحر، د نظارت امر حبيب الله حبيب، دانسجام امر حکمت الله سحر او د مرکزي هستې د نظارت غړو ګډون درلود.
د آزموينې په پيل کې تدريسي مرستیالې روحانيه سحر ګډونوالو ته ډاډ ورکړ، چې آزموينه به شفافه او هر ډول درغلۍ نه پاکه وي، او وې ويل، موږ غواړو چې دلته د زده کړو بهير لا پياوړی شي.
دغه آزموينه د پوهنې رياست د رهبرۍ له لوري په منظم او شفاف ډول د (۸، ۹، ۱۰) ټولګيو لپاره واخيستل شوه، چې د بیلا بیلو سيمو ۶۸۳ تنو راستانه شويو کډوالو په کې ګډون درلود، چې د آزموينې له پایلو وروسته به هر کس د خپلې وړتيا له مخې اړوندو ټولګيو کې شامل شي.
هيره دې نه وي، چې دغه ډول آزموينه هرکال د پوهنې رياست له لورې اخيستل کيږي، او هرکال سلګونه کسانو ته د دې پروسې له لارې د زده کړو زمينه برابريږي.
