د پوهنې وزارت د دعوت او ارشاد ریاست فعالیتونو ته لنډه کتنه
د اسلامي امارت د مجاهدینو په لاس د کابل تر فتحې وروسته، د عالیقدر امیرالمؤمنین شیخ هبة الله اخندزاده صاحب د ځانګړي هدایت په اساس، د اسلامي امارت د ټولو اړوندو وزارتونو او مستقلو ادارو په چوکاټ کې د دعوت او ارشاد په نامه ریاستونه تاسیس شویدي، چې د اداراتو په داخل کې د امربالمعروف، نهی عن المنکر، سمع شکایات، د وزارت د ټولو چارو نظارت اوڅارنه او د شرعي درسونو او اصلاحي پروګرامونو د تنظیم دنده په غاړه لري.
دپوهنې وزارت په چوکاټ کې هم په یاد نامه یو فعال ریاست موجود دی، چې الحاج مولوي عبدالحی حازم صاحب یې د رئیس په توګه دنده اجراء کوي. د یاد ریاست په تشکیل کې د امام، مدرس ، مؤذن مبلغ، اجرائیه مدیر او ځيني نور بستونه موجود دي.
یاد ریاست تر لوی اختر وړاندې د وزارت د مامورینو لپاره د قرآنکریم د ژباړې او د خپل ځانګړي نصاب په اساس شرعي درسونه درلودل، چې دپوهنې وزارت په مسجدکې به دوزارت ټولو کارمندانو ته تدریس کېدل. اوس مهال په اونۍ کې پنځه ورځې د وزارت کارمندانو ته د ماسپښین تر لمانځه وړاندې شرعي درسونه او اصلاحي پروګرامونه وړاندې کوی.
د یاد ریاست مسئولینو تر لوی اختر وروسته د وزارت له ټولومعینیتونو او مرکزي ریاستونو سره غونډې درلودې، چې له دې جملې څخه په ۱۴۴۳/۱۲/۱۸هـ ق نېټه یې د ښوونې او روزنې معینیت له اړوندو ریاستونو، په۱۴۴۳/۱۲/۱۹هـ ق نېټه یې د وزارت د مقام او دفتر د عمومي ریاست له اړوندو ریاستونو او په ۲۱/۱۲/۱۴۴۳هـ ق نېټه یې د اسلامي تعلیماتو او کیفیت د تضمین معینیتونو له اړوندو ریاستونو سره غونډې درلودې. په یادو غونډو کې په وزارت کې د شرعي درسونو او اصلاحي پروګرامونو په مهال وېش بحث وشو. پرېکړه وشوه، چې په اونۍ کې پنځه ورځې به په نوبت سره د وزارت کارمندانو ته شرعي درسونه تدریس کېږي، هغوی ته به په شریعت باندې د عمل کولو، انفرادي او ټولنیزې تقوا اختیارولو، له رشوت، اختلاس او اداري فساد څخه د ځان ساتلو او سیرت او صورت په اسلامي شریعت باندې برابرولو په هکله سپارښتنې کېږي. له نېکه مرغه د یادو درسونو او اصلاحي پروګرامونو لړۍ په بریالیتوب سره روانه ده. د وزارت کارمندان له درسونوڅخه زیات خوښ دي او په منظم ډول ورته حاضرېږي.
د وزیرانو شورا د( ۱۹) ګڼه مصوبې په اساس، د پوهنې وزارت د محترم وزیر صاحب په لاسلیک د هیواد د پوهنې ټولو ولایاتي ریاستونو ته مکتوبونه استول شویدي ترڅو هر ریاست د دعوت او ارشاد ریاست ته خپل امام مبلغ ور معرفي کړي. زیاترو ریاستونو دا کار کړیدی او په نږدې راتلونکې کې به پاتې ریاستونه هم خپل امام مبلغ معرفي کړي.
د یادونې وړ ده، چې د پوهنې دولایتي ریاستونو په چوکاټ کې هم د دعوت او ارشاد فعالیتونه پیل شویدي او په نږدې راتلونکې کې به د هیواد مدارسو، ښوونځیو او نورو تعلیمي مرکزونو ته هم د یاد ریاست فعالیتونه وغزول شي.ان شاءالله .
