له ولایاتو څخه د پوهنې خبرونه

هرات:
د هرات ولایت د خواجه محمد کوهي د منځني ښوونځي احاطوي دیوال د پوهنې وزارت د کیفیت د تضمین د معین الحاج مولوي عبدالخالق صادق له خوا د هرات د پوهنې د مسوولینو په حضور کې پرانیستل شو.
 د پوهنې وزارت د کیفیت د تضمین معین د یاد ښوونځي د دېوال جوړول یو ښه کار وباله او د خفي پطرولیم شرکت له رئیس الحاج بشیر احمد خفي څخه یې د دغه ۱۲۰۰ متره دیوال د لګښت د ورکړې له امله مننه وکړه.
کندهار:
د کندهار ولايت د پوهنې چارواکي وايي، هغه ۷ ورځنى سيمينار چې د SHAO موسسې له خوا د يونيسف په مالي مرسته د دغه ولايت د آمرینو او مديرانو لپاره په لاره اچول شوى و، پاى ته ورسېد. د دغه ولایت د پوهنې رئیس مولوي فخرالدین نقشبندي له ګډونوالو وغوښتل، چې د دغه سیمینار له لارې خپلې تجربې له خپلو کارکوونکو سره شریکې کړي.
جوزجان:
يو شمېر ديني عالمانو د ستاينليک په ورکولو سره د جوزجان ولايت د پوهنې د رئيس الحاج مولوي محمد طاهر جواد د سترو خدمتونو او ښو هڅو څخه مننه وکړه.
لغمان:
د لغمان ولایت د قرغېو ولسوالۍ د پوهنې آمریت د تعلیمي څارنې غړو د دې ولسوالۍ له یو شمېر ښوونځیو څخه د څارنې او کتنې په ترڅ کې د یادو ښوونځیو له ښوونکو او د شورا له غړو سره وکتل او د پوهنې بهیر د کیفیت او ښه والي په اړه یې خبرې وکړې.
نیمروز:
د ظرفیت لوړونې ۱۲ ورځنی سیمینار چې د "کوار" موسسې لخوا د چخانسور ولسوالۍ د پوهنې آمریت د سیمه ایزو ټولګیو د ۴۶ تنو ښوونکو او د پوهنې د نویو ګمارل شویو ښوونکو لپاره جوړ شوی و، پای ته ورسید.
د نيمروز ولايت د پوهنې رئيس مولوي ګل احمد حقاني د دا ډول سيمينارونو جوړېدل ډېر مهم او ارزښتناک وبلل او د پوهنې له رياست سره يې د مرستندويه بنسټونو د مرستو د دوام غوښتنه وکړه.