د پوهنې او لوړو زده کړو وزارتونو، د تخنیکي او مسلکي زده کړو ادارې ترمنځ د همغږۍ ناسته وشوه
د تحصیلي او تعلیمي درې ګونو بنسټونو ( لوړو زده کړو وزارت، پوهنې وزارت او د تخنیکي او مسلکي زده کړو ادارې ترمنځ د تحصیلي او تعلیمي چارو په برخه کې د لا غوره همغږۍ د رامنځ ته کولو په موخه د پوهنې وزارت د ښوونې او روزنې معینیت د کنفرانسونو په تالار کې غونډه جوړه شوه.
په دې ناسته کې د پوهنې وزارت په استازیتوب د ښوونې او روزنې معین الحاج مولوي سخاء الله سعید، د لوړو زده کړو وزارت د نصاب رئیس مفتي عبدالرؤف فراهي او د تخنیکي او مسلکي ادارې مرستیال مولوي غلام سعید احساس حضور درلود.
د کمېټې د غړو په وینا؛ د دې کمېټې له جوړېدو څخه یې موخه د هغو متخصصینو او مسلکي کارکوونکو ترمنځ همغږي رامنځته کول دي، چې اسلامي، شرعي اصولو او ارزښتونو ته ژمن دي. همدارنګه په ګډه د درې ګونو بنسټونو د پروګرامونو، قوانینو، مقرراتو او ستراتیژیو پلي کول دي.
یاده کمېټه هڅه کوي تر څو ټول هغه اسنادونه چې د محتوا له مخې یو له بل سره تړاو لري د همغږۍ کمېټې په مرسته یې چمتو او عملي کړي.
