د ولایتونو څخه د پوهنې اړوند څو لنډ خبرونه!
ننګرهار:
د ننګرهار ولایت د پوهنې، استخباراتو، سرحدي لوا، کلیو پراختیا او سیمه ییزو ادارو یو شمېر نورو مسوولینو د دغه ولایت په اچین او سپین غر ولسوالیو کې له وېجاړو شویو ښوونځیو لیدنه وکړه او د يادو ښوونځيو د بيا رغونې په اړه يې خبرې او لازمې پرېکړې وکړې.
ياد شوي ښوونځي پخوا د بېلابېلو اقليمي او داسې نورو عواملو له امله وېجاړ شوي وو.
په یو بل خبر کې؛ د ننګرهار د پوهنې ریاست د دغه ولایت د کوټ، بټي کوټ، دره نور او حصارک ولسوالیو د ديني مدرسو په ۹۰ خالي بستونو کې د ښوونکو د ګومارنې په موخه له سلګونو تنو وړ نوماندانو څخه رقابتي ازموینه واخیسته.
سرپل:
د سرپل ولایت د پوهنې رئیس مفتي محمد رحماني د دغه ولایت د بلخاب ولسوالۍ د پوهنې له مسوولینو سره وکتل او د دې ولسوالۍ د پوهنې د نظام وضعیت یې وارزاوه.
نوموړي د دغه کاري سفر په ترڅ کې د يادې ولسوالۍ د يو شمېر ښوونځيو او ديني مدرسو اداري او تدريسي چارې هم وڅېړلې او د يادو ښوونځيو او ديني مدرسو له ښوونکو او زده کوونکو سره يې وکتل.
پروان:
د پروان ولایت د پوهنې رئیس مفتي محمد حسن حقاني او ورسره مل پلاوي د یوه کاري سفر په ترڅ کې د دغه ولایت سرخ پارسای ولسوالۍ ته ولاړ او د ستونزو د حل په موخه یې د دې ولسوالۍ د یو شمېر ښوونځیو او ديني مدرسو اداري او تدریسي چارې وڅېړلې او د تعلیمي چارو د ښه والي په خاطر يې چارواکو ته لازمې لارښوونې وکړې.
لوګر:
د لوګر ولایت د حضرت امیر حمزه(رض) مرکزي یتیم خانې زده کوونکي د اختر په ډاليو ونازول شول.
يادې ډالۍ د لوګر ولايت د پوهنې رياست د مشرتابه له خوا چمتو شوې وې او د دغه ولايت د پوهنې رئيس مولوي جنت ګل عزيز له خوا د يادې ادارې پر ۷۱ تنو يتيمانو ووېشل شوې.
