د اسلام د ستر پیغمبر حضرت محمد(صلی الله علیه وسلم) د میلاد مبارکه ورځ د ولایتونو پوهنې ریاستونو کې په ځانګړو شاندار مراسمو سره ولمانځل شوه.
د ولايتونو له پوهنې رياستونو څخه ترلاسه شوي راپورونه ښيي؛ چې د بشریت د ستر لارښود حضرت محمد (صلى الله عليه وسلم) د میلاد مبارکه ورځ د پوهنې رياستونو د مشرتابه، لوړ پوړو دولتي مسئولینو، علماوو،د ښوونځیو استادانو او زده کوونکو په ګډون، د یو لړ ځانګړو او شاندارو مراسمو په ترڅ کې ولمانځل شوه.
یادې غونډې د قرآن عظيم الشان په مبارکو ايتونو سره پيل او د مسئولينو له لوري زموږ د ګران پيغمبر حضرت محمد (صلى الله عليه وسلم) سيرت مبارک ولوستل شو، چې د ګډون والو له لوري يې تود هرکلى وشو.
ورپسې د ولایتونو پوهنې رئیسانو په یادو پرتمینو مراسمو کې ورغلو مسئولینو او مېلمنو ته ښه راغلاست ووایه او د اسلام د ګران پیغمبر حضرت محمد (صلی الله علیه وسلم) د نېکو اخلاقو په اړه یې تفصیلي خبرې وکړې.
په ورته مهال يو شمېر مسئولينو، ښوونکو او زده کوونکو هم د اسلام د ستر پيغمبر حضرت محمد (صلى الله عليه وسلم) د سيرت په باب خپلې چمتو کړې مقالې، نعتونه او ترانې ګډون والو ته ولوستلې او خلکو ته يې د خوږ پیغمبر د سنتو د عملي کولو لارښوونه وکړه.
ویناوالو د بشري ټولنې له ګډوډۍ او ناخوالو څخه د خلاصون یوازینۍ لار د بشریت د ستر لارښود حضرت محمد (صلی الله علیه وسلم) د سنت او لارې عملي کول یاد کړل.
یادې غونډې د افغانستان د خلکو تر منځ د اسلامي ورورولۍ او د پوهنې د پرمختګ په دعا سره پای ته ورسېدې.
