د ولایتونو له پوهنې ریاستونو څخه لنډ خبرونه
لغمان
د لغمان ولایت پوهنې رئیس مولوي شاه جهان ساجد، د یاد ولایت د قرغیو ولسوال مولوي نورالهادي صارم سعید سره وکتل او د پوهنې د پرمختګ او ستونزو د حل په اړه یې ورسره خبرې وکړې.
د قرغیو ولسوال ژمنه وکړه، چې د پوهنې رياست له پروګرامونو سره به همکاري کوي.
د یو بل خبر له مخې:
د لغمان ولایت پوهنې رئیس مولوي شاه جهان ساجد او د یاد ریاست د انجنیرۍ ټېم د دغه ولایت په قرغیي ولسوالۍ کې د ښوونځیو د حفظ الصحې د ۶ پروژو د جوړولو چارې چې د یونیسف ادارې له لوري د ۳۷ میلیونه افغانیو په لګښت تمویل او تر کار لاندې دي، څارنه وکړه.
نوموړي د لاسلیک شوي تړون له مخې د کار په لوړ کیفیت او دوام ټینګار وکړ.
سمنګان
د سمنګان ولايت پوهنې رياست کاري غونډه د یاد ولایت پوهنې رئیس په مشرۍ او د پوهنې په برخه کې د همکارو ادارو د مسئولينو په ګډون جوړه شوه.
د سمنګان پوهنې رئیس د يادو ادارو له همکاريو څخه د مننې ترڅنګ له هغوى وغوښتل، چې د پوهنې رياست سره په همغږۍ او د کړنلارې له مخې خپلې چارې پرمخ يوسي.
پنجشېر
د پنجشېر ولايت پوهنې رئیس مولوي غلام ایشان حماس له خپل يو پلاوي سره د یاد ولايت شتل ولسوالۍ د ذاکر ګلاب الدين شهيد ليسې، د نجونو ليسې او ديني مدرسې څخه ليدنه وکړه. نوموړي په یادو لیدنو کې د زده کوونکو اداري، تدریسي او ښوونیز اسناد وڅېړل.
پکتیا
د پکتيا ولايت پوهنې رئيس مولوي عبدالوکيل خالد، د یاد ولايت شواک، وزي ځدراڼ او ګرده څېړۍ ولسواليو ته د يوه کاري سفر په ترڅ کې، د يو شمېر ښوونځيو له اداري او تدريسي چارو څخه څارنه وکړه او مسئولينو ته يې لازمې لارښوونې وکړې.
نوموړي د ښوونیز وضعیت د لاښه والي په موخه اړوندو مسئولینو ته لازمې سپارښتنې وکړې.
