د ولايتونو په پوهنې رياستونو کې د ديني علومو آزموينې واخیستل شوې
د پوهنې وزارت د مرکزي څانګو له کارکوونکو څخه د دیني علومو آزموینې اخیستلو سره په یو وخت، د هېواد د ولایتونو په پوهنې ریاستونه کې د یاد وزارت د دعوت او ارشاد ریاست د ځانګړي پلان په بنسټ او د پوهنې ریاستونو د دعوت او ارشاد له مسئولینو سره په همغږۍ، د یادو ریاستونو له کارکوونکو څخه د دیني علومو ۴۰ فیصده آزموینې واخیستل شوې.
د ولایتونو پوهنې رئیسانو او مسئولینو، د ټولنې په اصلاح او له بدیو څخه د مخنیوي په برخه کې د دیني علومو د زده کړې پر رول خبرې وکړې او د پوهنې کارکوونکو ته یې په خپلو ورځنيو چارو کې د آمرینو په اطاعت، رښتینولۍ او له مراجعینو سره د صادقانه چلند پر کولو لارښوونه وکړه.
له بل لوري، د ولایتونو پوهنې ریاستونو کارکوونکو او نورو مسئولینو د پوهنې وزارت د اداري مقرراتو او کړنلارو په رعایتولو کې د ټینګار ترڅنګ، د پوهنې کارکوونکو لپاره د دیني علومو د ټولګیو له جوړېدو څخه خوښي څرګنده او زیاته یې کړه، چې په دې سره به د اسلامي زده کړو په برخه کې د دوی پوهه لاپراخه شي.
