د ولایتونو له پوهنې ریاستونو څخه ځینې خبرونه
تخار
د تخار ولایت پوهنې ریاست مشورتي غونډه، د یاد ولایت پوهنې رئیس الحاج مولوي حزب الله مبشر تر څارنې لاندې جوړه شوه.
د تخار پوهنې رئیس د مسئولینو د دندو او فعالیتونو راپورونه واورېدل او له هغوی یې وغوښتل تر څو د خپلو راتلونکو پلانونو په پلي کېدو کې جدي هڅې وکړي.
سرپل
د سرپل ولايت پوهنې رياست د امام يخي او خطيب آباد د هلکانو په لېسو کې د ښوونځيو له سلګونو زده کوونکو څخه د رسول الله (صلي الله علیه وسلم) د سيرت سیالۍ په لاره واچولې.
د یادو سیالیو د ترسره کولو موخه، د رسول الله (صلي الله علیه وسلم) له ټولنیزو کړنو او اخلاقو سره د ځوانانو آشنا کول ؤ.
لوګر
د لوګر ولایت پوهنې ریاست مشرتابه د یاد ولایت له مسئولینو او کارکوونکو سره د یوې سترې غونډې په ترڅ کې، د هرات ولایت د زلزله ځپلیو کورنیو او ټپیانو ته د خپلې خواخوږۍ او ډاډګیرنې مراتب وړاندې کړل او د زلزله ځپلیو لپاره یې د نغدي مرستو د راټولولو پر څرنګوالي خبرې وکړې.
