د هندوستان دیوبند دارالعلوم د علماوو او شیُّخو یوه ګډ پلاوي د پوهنې وزارت له معینانو سره وکتل
د هندوستان هېواد دیوبند دارالعلوم یوه پلاوي، چې په ترکیب کې یې د دیوبند دارالعلوم فاضل مفتي محمد ظهیرالسلام باربنکوی، د بنګله دېش د مرکز العلوم الشرعیه او د وفاق المدارس القومي مشر او مهتمم مفتي محمد ضیاء بن قاسم، د دیوبند دارالعلوم فاضل مولانا محمود الحسن دیوبندي او پروفیسر محمد فاروق متقاعد جونئرکالج دهلي شامل ؤ، د پوهنې وزارت په مرکزي دفتر کې د یاد وزارت له معینانو سره د کتنې په ترڅ کې د افغانستان د روانو حالاتو او پوهنیز نظام په اړه هراړخیز بحثونه وکړل.
یاد پلاوي د پوهنې وزارت د مشرتابه له مېلمه پالنې څخه د مننې تر څنګ، د دغه وزارت د مشرتابه دندې او لاس ته راوړنې په تفصیل سره یادې او وستایلې.
د پلاوي غړو وويل: ډېر د خوښۍ ځای دی، چې د افغانستان د اوسني نظام په رأس کې علماء قرار لري او موږ ډاډه يو، چې د اسلام د سپېڅلي دين د احکامو او لارښوونو په رعايتولو سره به وکولای شي، تر څو ټولې شته ستونزې په لږ وخت کې له منځه یوسي.
ور پسې د پوهنې وزارت د ښوونې او روزنې معین الحاج مولوي سخاء الله سعید، د یاد وزارت مقام ته د دیوبند دارالعلوم پلاوي ته د هرکلي په ترڅ کې، د پوهنې وزارت د کړنو او تشکیلاتو په اړه مفصل معلومات وړاندې کړل، ویې ویل: په ټولیزه توګه د پوهنې وزارت اړوند ۳۲ ریاستونه په مرکز او ۳۴ ریاستونه د هېواد په ولایتونو کې فعالیت لري، چې شاوخوا ۴۰۰ زره کارکوونکي یې د ټول هېواد په ښوونیزو او روزنیزو بنسټونو کې په ورځنيو چارو بوخت دي.
د پوهنې وزارت د ښوونې او رزونې معین زیاته کړه، متاسفانه د تېر نظام پر مهال په هېواد کې د اسلامي زده کړو برخې ته پوره پاملرنه نه ده شوې، چې له نېکه مرغه د افغانستان.ا.ا. حاکمیت سره په ټول هېواد کې د عصري او اسلامي زده کړې دواړو برخو ته په بشپړه توګه پاملرنه شوې او یادو برخو کې د پام وړ پرمختګونه رامنځ ته شوې دي.
نوموړي زیاته کړه: پخوا به د پوهنې وزارت نیږدې ۷۰ سلنه مالي لګښتونه د مرسته کوونکو هېوادونو له لوري ورکول کېدل، خو اوس د پوهنې وزارت ټول لګښتونه د افغانستان.ا.ا. له ملي بودیجې څخه تمویل او په خپل وخت ورکول کېږي.
په پاى کې دواړو لورو په متقابلو اړیکو ټينګار وکړ او ژمنه يې وکړه چې په افغانستان کې د اسلامي زده کړو د بنسټونو په جوړولو او پراخولو کې به له يو بل سره همکاریو ته دوام ورکړي.
غونډه د اسلامي امت د سوکالۍ او د فلسطین له مظلوم ملت سره د نابرابره او ظالمانه جګړې د پای ته رسېدو په دعائیې سره پای ته ورسېده.
