د ماشومانو د خوندیتوب مؤسسې پلاوي په ننګرهار ولايت کې د پوهنې وزارت د سرچینو او ادارې له معین سره وکتل
د پوهنې وزارت د سرچینو او ادارې معین مولوي صبغت الله وصیل، د راستنېدونکو کډوالو ماشومانو لپاره د زده کړو آسانتياوو برابرولو په موخه، ننګرهار ولايت ته رسمي سفر وکړ او د پوهنې رياست مقام کې يې د ماشومانو د خوندیتوب مؤسسې یو پلاوي سره وکتل.
په ياده کتنه کې دواړو لورو، راستنیدونکو ته د زده کړې پر کړنلاره او هغوى ته د زده کړو په برخه کې د آسانتياوو پر برابرولو تفصیلي خبرې او بحثونه وکړل.
د سرچینو او ادارې معین وویل: چې د ا.ا.ا د مشرتابه له لورې ټاکل شوې مؤظفه کمېټه پوره چمتووالی لري، ترڅو راستنیدونکو ماشومانو ته د پوهنې وزارت له لورې د منظور شوې کړنلارې له مخې د زده کړې زمینه برابره کړي.
دغه راز نوموړي له مرستندویه مؤسسو څخه وغوښتل، ترڅو په دغو شرایطو کې له راستنیدونکو سره خپلې همکارۍ ونه سپموي.
