د کابل ښار د ښوونځیو د زده کوونکو ترمنځ د سوک وهنې سیالۍ ترسره شوې
د پوهنې وزارت د اساسي او ثانوي زده کړو ریاست د پلان له مخې، د سوک وهنې د لوبو سیالۍ چې د سلواغې میاشتې په ۲۶مه نېټه له ګران هېواد څخه د شوروي ځواکونو د ماتې او وتلو په مناسبت، د کب په ١٦مه، د کابل ښار د ۲۰ بابه ښوونځيو اړوند د بېلابېلو عمرونو د ٨٥ ورزشکارانو ترمنځ د پوهنې وزارت د سوک وهنې په کلپ کې پرانيستل شوې وې، پای ته ورسېدې.
د يادو دوه ورځنيو سياليو په پاى کې د پوهنې وزارت د اساسي او ثانوي زده کړو رياست او د همدې رياست د بدني روزنې آمريت د مسئولينو له لوري ګټونکو ټېمونو ته کپونه، مډالونه او سپورتي جايزې ورکړل شوې.
د پوهنې وزارت د اساسي او ثانوي زده کړو ریاست د بدني روزنې مسئولینو د انسان په روغتیا کې د سپورټ رول ته په اشارې سره وویل: چې د ښوونځیو او مدارسو د زده کوونکو ترمنځ د سپورټ وده او پراختيا د ياد وزارت له مهمو پروګرامونو څخه دي.
