د پوهنې وزارت د ښوونيز نصاب او د ښوونکو د مسلکي پراختیا لوی رئیس کندوز ولایت ته په رسمي سفر ولاړ
د پوهنې وزارت د ښوونيز نصاب او د ښوونکو د مسلکي پراختيا لوی رئیس الحاج مولوي اول ګل ایوبي په مشرۍ یو پلاوی کندوز ولایت ته ورسېد.
په پیل کې نوموړي د کندوز ولایت له پوهنې رئیس مولوي محمد اسماعېل «ابواحمد» سره وکتل او د خپل سفر د موخو او آجنډا په اړه یې معلومات ورکړل.
یاد پلاوي د ستونزو پر حل او په ښوونیزو بنسټونو کې د درسي کيفيت پر لوړولو د ټینګار ترڅنګ څرګنده کړه، د ښوونځیو د مدیرانو د وړتيا لوړولو په اړه د سیمینار څارنه او د ښوونکو د مسلکي کولو د څانګو د اداري او تدریسي بهیر ارزونه هم د پلاوي د سفر په پلانونو کې شامله ده.
ورپسې د کندوز ولایت پوهنې رئیس، د ورغلي پلاوي هر کلی وکړ او د پوهنې ریاست د کارکوونکو لپاره یې د مسلکي سیمینارونو له پیل څخه خوښي څرګنده کړه.
