د پوهنې وزارت د سرچینو او ادارې معین د کابل ولایت له پوهنې مسئولینو سره وکتل
د پوهنې وزارت د سرچینو او ادارې معین مولوي صبغت الله وصیل او ورسره مل پلاوي، د کابل ولایت له پوهنې رئیس او مسئولینو سره وکتل.
په پیل کې د پوهنې وزارت د سرچینو او ادارې معین په ښوونځیو کې د پوهنې د کیفیت د لوړولو په برخه کې د یاد وزارت د پالیسۍ او ستراتیژۍ په اړه خبرې وکړې او د دیني لارښوونو پر استناد یې د چارو په سم تطبیق ټینګار وکړ.
نوموړي د کابل ولایت د پوهنې ریاست د تشکیل د بیا کتنې په اړه هم خبرې وکړې او په یاده برخه کې یې یوې کمېټې ته دنده وسپارله، تر څو د ستونزو د حل او د دغه ریاست د تشکيل د څرنګوالي په تړاو کار ترسره کړي.
ورپسې د کابل ولایت د پوهنې رئیس الحاج مولوي عبدالحق حقاني، د پوهنې وزارت د سرچینو او اداري د معین ورتګ ته د ښه راغلاست تر څنګ، د یاد ریاست اړوندې اداري ستونزې او وړاندیزونه د وزارت مشرتابه ته وړاندې کړل او د پوهنې ریاست اړوندو څانګو یو شمېر مسئولین یې د تشکیلاتي جوړښت د بیا کتنې لپاره د وزارت تخنیکي کمیټې ته وروپېژندل.
