د ولایتونو له پوهنې ډګره د څو مهمو خبرونو لنډیز
کاپیسا
د کاپیسا ولایت پوهنې رئیس مولوي محمد فرید حقاني، د یاد ولایت مرکز اړوند د امام اعظم «رحمه الله علیه» او عبدالله ابن مسعود «رضی الله عنه» د دارالحفاظونو اداري او تدریسي چارو د کتنې تر څنګ، د یادو بنسټونو شاګردانو ته د حضرت محمد « صلی الله علیه وسلم» د سنتو او اخلاقو په تړاو توصیه وکړه.
لوګر
د لوګر ولایت یو تن فرهنګي او علمي شخصیت عطاء الله ستانکزي د ۵۰ زره افغانیو په ارزښت، د یاد ولایت د محمداغې ولسوالۍ د کتب خېلو لېسې د کتابتون لپاره ۴۲۱ جلده درسي کتابونه مرسته وکړه.
هلمند
د هلمند ولایت پوهنې رئیس الحاج مولوي محمد عوض انصاري، د یاد ولایت مرکز لښکرګاه اړوند د غربي بازار ښوونځي اداري او تدریسي چارې وارزولې.
د یو بل خبر له مخې
د هلمند ولایت پوهنې ریاست د یاد ولایت مرکز اړوند د ملالۍ ظاهر مدارسو ته، د اووم تر دولسم ټولګيو اړوند ۹ زره ۸۸۲ ټوکه درسي کتابونه ووېشل.
د پوهنې مسئولین وايي: ډېر ژر به په رسمي مدارسو کې هم د کتابونو د وېش لړۍ پیل کړي.
کابل
د کابل ولايت پوهنې رياست، هېواد ته د راستانه شويو زده کوونکو څخه د سویې د تثبیت آزموينه واخيسته.
په یاده آزموینه کې شاوخوا ۲۰ تنو برخه اخیستې وه او ټاکل شوې، چې هغوی د خپلو سویو سره سم د ښوونځيو په ۷ تر دولسمو ټولګیو کې شامل شي.
