د ولایتونو ځینو مهمو خبرونو ته لنډه کتنه
خوست
د خوست ولايت پوهنې رئيس مولوي فيض الله جمال حقاني، د اسمعيل خېلو مندوزيو ولسوالۍ د پوهنې له يو شمېر مسئولينو، علماوو او قومي مشرانو سره وکتل او له هغوى سره يې د هېواد بچيانو د سالمې ښوونې او روزنې د کیفیت د څرنګوالي په اړه د خبرو ترڅنګ، له خلکو څخه د همکارۍ غوښتنه يې وکړه.
لغمان
د لغمان ولايت پوهنې رئيس مولوي شاه جهان ساجد د ياد ریاست له آمرینو، مديرانو او کارکوونکو سره وکتل.
دغه راز نوموړي د پوهنې کارکوونکو له هڅو څخه د ستاينې ترڅنګ، له مراجعينو سره پر ښه چلند ټينګار وکړ.
هلمند
د هلمند ولايت پوهني رياست کارپوهانو د یاد ولايت د ديني مدارسو مسئولينو او مهتممینو ته د وړتیا لوړولو سيمينار جوړ کړ.
په یاد سیمینار کې ګډون والو ته د تدريس مېتودونه او مهم اداري او مالي مسايل وروښودل شول.
پروان
د پروان ولايت د پوهنې د رئيس مولوي سيد محمد فيضي له خوا د پسرلني فوټسال ټورنمنټ سيالۍ په رسمي ډول پيل او په لاره واچول شوې.
ټاکل شوې ده ، چې یادې سيالۍ د مرکز او بګرام ولسوالۍ د ١٦ لېسو د سپورټي لوبډلو ترمنځ د مولوي سيدباشي شهيد په لېسه کې پيل شي.
لغمان
د لغمان ولایت پوهنې رئیس د یاد ولایت د تدریسي څانګو له کارکوونکو سره وکتل او له هغوی سره یې د ښوونځیو د کلنیو آزموینو د اخیستلو پر چمتووالي (لغمان ولایت یو له ګرمو ولایتونو څخه دی) تفصیلي خبرې وکړې او هغوی ته یې لازمې لارښوونې وکړې.
