د ولایتونو پوهنې کړنو ته لنډه کتنه
لوګر
د لوګر ولایت په مرکز پل علم ښار کې د ج/هادي لېسې د زده کوونکو د والدینو له لوري د ۱۸زره افغانیو په مالي مرسته، د یادې لېسې لابراتوار خونه د مېزونو- څوکیو ترڅنګ ترمیم او د زده کوونکو لپاره ګټې اخیستنې ته وسپارل شوه.
بلخ
د پوهنې وزارت د روزونکو له لوري د یو مرستندویه بنسټ په مالي همکارۍ، د بلخ ولایت د ښوونځيو شاوخوا ۵۵۸ تنو مدیرانو او ښوونکو د وړتیا لوړونې سیمینار د تصدیق پاڼو په وېشلو سره پای ته ورسېد.
هلمند
د هلمند ولايت پوهنې رئيس الحاج مولوي محمد عوض انصاري، د یاد ولايت نوزاد ولسوالۍ ته د خپل سفر په ترڅ کې، د حقانيه ديني مدرسې له ښوونيزو کړنو څخه څارنه وکړه او زده کوونکو ته يې اړینې لارښوونې وکړې.
فراه
د فراه ولایت پوهنې رئیس الحاج مولوي اختر محمد زعیم، د یاد ولایت د مرکز او ولسوالیو د پوهنې له یو شمېر مسئولینو سره وکتل او له هغوی یې وغوښتل، تر څو د زده کوونکو د تدریسي کیفیت په لوړولو کې لا زیاتې هڅې وکړي.
سرپل
د سرپل ولایت پوهنې رئیس مولوي محمد رحماني بلخاب ولسوالۍ ته د یوه کاري سفر په ترڅ کې، د یادې ولسوالۍ د پوهنیز کیفیت او همدارنګه د دغه ولایت په تودو سیمو کې له آزموینو بهیر څخه څارنه وکړه.
