د پوهنې وزارت له لوري په پنجشېر ولایت کې یو باب دیني مدرسه تاسیس شوه
د پوهنې وزارت ښوونې او روزنې معین الحاج مولوي سخاءالله سعید په مشرۍ د یاد وزارت رسمي پلاوی، د یو باب لیلیه مدرسې د تاسیس او پوهنیز وضعیت بیاکتنې په موخه، پنجشېر ولایت ته ورسېد.
په پیل کې د پوهنې وزارت معین د پنجشېر ولایت له پوهنې رئیس مفتي حبیب الله نوري قتاده او یو شمېر نورو مسئولینو سره د مدارسو او ښوونځيو پر ښوونیزو ستونزو او فعالیتونو تفصیلي خبرې وکړې او ورپسې یې د یاد ولایت د علماوو شوار رئیس شیخ قیام الدین حنیف او د دغه ولايت د پوهنې مسئولینو په مشوره د یو باب لیلیه مدرسې لپاره چې د ۲۰۰ تنو زده کوونکو ظرفیت به ولري، مناسب ځاى وټاکه.
همدارنګه نوموړي د پوهنې وزارت د ښوونیزو پلانونو او پروګرامونو یادونه وکړه او ویې ویل: د پوهنیزو چوپړونو د وړاندې کولو ترڅنګ به د زده کوونکو لپاره د نورو اړینو آسانتیاوو د برابرولو هڅو ته دوام ورکړي.
د پوهنې رئیس او یو شمېر علماءکرامو د پوهنې وزارت د مشرتابه له دغه نېک اقدام څخه مننه او قدرداني وکړه.
