په فاریاب ولایت کې د یو باب ښوونځي بیارغونې چارې بشپړې شوې
دفارياب ولايت پوهنې رئيس الحاج مولوي محمدطاهر جواد، د یاد ولايت ګرزيوان ولسوالۍ د جر قلعه ښوونځي ودانۍ، چې پخوا د اور لګېدنې له امله زیاینمنه شوې وه؛ تر بیارغولو وروسته پرانیستله.
نوموړي وويل: د پوهنې وزارت د رهبرۍ د پاملرنې او له ښوونیز نظام سره د همکارو بنسټونو د مالي ملاتړ په پايله کې، د جرقلعه ښوونځي بيارغونې چارې، چې پخوا پيل شوې وې، د ۴۵ زره ډالرو لګښت سره په دې وروستيو کې پاى ته ورسېدې او د زده کوونکو پرمخ پرانیستل شو.
د پوهنې رئیس په وينا، په همدغه پروژه کې د درسي ټولګيو رغول، د پاکو اوبو او برېښنایي سيسټم نصبول، احاطوي دېوال او نور اړین ملحقات شامل دي.
په ورته مهال نوموړي له زده کوونکو وغوښتل، تر څو د یادې ودانۍ د پالنې او تجهيزاتو په ساتلو کې له پوره اخلاص څخه کار واخلي.
له بلې خوا د سیمې اوسېدونکو د دوی ماشومانو ته د زده کړو د آسانتیاوو د پراختیا او برابرولو په برخه کې د پوهنې وزارت د مشرتابه له پاملرنې خوښي څرګنده کړه او د جوزجان پوهنې ریاست سره یې د خپلو همکاریو ډاډ ورکړ.
