د هېواد د شمالي ولایتونو له پوهنې رئیسانو سره د "برید" سیستم آنلاین لارښود غونډه جوړه شوه
نن د پوهنې وزارت دولایتي چارو د انسجام لوی ریاست له لوري، د هېواد د شمالي ولایتونو له پوهنې رئیسانو سره د سندونو برېښنایي کولو رسمي سیسټم (برید) آنلاین لارښود غونډه جوړه شوه.
په پیل کې د پوهنې وزارت د مقام د دفتر لوی رئیس الحاج مولوي شهاب الدین ثاقب د یاد سیسټم ګټو ته په اشارې سره وویل: «برید» سیسټم له مرکز څخه ولایتونو او برعکس له ولایتونو مرکز ته د ټولو اسنادو، مکتوبونو او د پوهنې ریاستونو د کاري راپورونو د خوندي کولو، پر وخت استولو، روڼتیا تامینولو او د یاد وزارت د مراجعینو په کارونو کې د چټکتیا په موخه جوړ شوی دی.
ورپسې د پوهنې وزارت د ولایتي چارو د انسجام لوی ریاست تخنیکي کارکوونکو له خوا د ولایتونو پوهنې ریاستونو مسئولینو ته د یاد سیسټم د تخنیکي برخو په اړه معلومات وړاندې شول.
په ورته مهال د پوهنې ولایتي مسئولینو هم د «برید» سیسټم د کار د څرنګوالي په اړه پوښتنې وکړې، چې د کارپوهانو له خوا ورته مفصل ځوابونه ورکړل شول.
