په خوست ولایت کې د دعوت او ارشاد ریاست د فرمانونو پلي کولو په اړه غونډه وشوه
د مولوي محمد نعیم عمیر په مشرۍ د پوهنې وزارت د دعوت او ارشاد ریاست پلاوي، په خوست ولایت کې د یاد ریاست د فرمانونو د پلي کولو په تړاو لویه غونډه کې ګډون وکړ، چې پکې د همدغه ولایت پوهنې رئیس مولوي فیض الله جمال حقاني، د ښوونیزو ادارو آمرینو، مدیرانو، استادانو، علماوو او د خلکو استازو هم حضور درلود.
مراسم د سپېڅلي کلام د څو مبارکو آیتونو په تلاوت سره پیل شول؛ ورپسې پوهنې رئیس د دعوت او ارشاد ریاست د پلاوي هرکلی وکړ.
نوموړي په خپلو خبرو کې د دعوت او ارشاد د احکامو د تطبیق په برخه کې د یاد ولایت د پوهنې ریاست دندو په اړه خبرې وکړې او څرګنده یې کړه: هغه فرمانونه او احکام چې د ا.ا.ا. د عالي مقام مشرتابه له لوري موږ ته توصیه کېږي، په حقیقت کې الهی اوامر دي، چې موږ یې پر پلي کول مکلف یو.
ورپسې نورو ویناوالو د ټولنې د اصلاح په برخه کې د اسلام د سپېڅلي دین د احکامو او د رسول الله "صلی الله علیه وسلم" د احادیثو په اړه هم خبرې وکړې، اطاعت یې د عباداتو بنسټ وګاڼه، له زده کوونکو او ځوانانو یې وغوښتل، تر څو د اسلام د ګران پیغمبر حضرت محمد "صلی الله علیه وسلم" د سنتو جدي پیروي وکړي.
غونډه د دعائیې په لوستلو سره پای ته ورسېده.
