د غزني ولایت د خلکو په مالي مرسته د یو ښوونځي د جوړېدو چارې پیل شوې
د پوهنې وزارت د چارواکو په وینا، په پام کې ده، د غزني ولایت قره باغ ولسوالۍ د شاکي کلي ا ړوند د ابوریحان البیروني ښوونځي ودانۍ په ۱۱ جرېبه ځمکه کې د ۹۵ زره ډالرو لګښت سره جوړه شي، چې په پایله کې به یې ۴۰۰ تنو زده کونکو ته یو مناسب ښوونیز چاپېریال رامنځته شي.
د ياد ښوونځي د جوړېدو لګښت د همدغه ولسوالۍ د خلکو له لوري ورکول کېږي.
د غزني ولایت پوهنې رئیس الحاج مولوي میر نصیر احمد حسیني، د یاد ښوونځي د پرانیستې پر مهال د ماشومانو لپاره د زده کړو د آسانتیاوو د برابرولو ډاډ ورکړ او له خلکو یې وغوښتل، چې د خپلو همکاریو د جاري ساتلو په لړ کې له پوهنې څخه ملاتړ وکړي.
د پوهنې وزارت مشرتابه هم د ښوونیز نظام په برخه کې د خلکو له مرستو مننه کوي.
