د غزني ولایت خلکو د پوهنې په برخه کې ۲۰ مېلیونه افغانۍ مرسته کړې
د غزني ولایت پوهنې ریاست پلاوی چې جاغوري، مالستان او اجرستان ولسوالیو ته د ښوونځيو شوراګانو د جوړولو په موخه تللی، وايي: د ۱۴۰۳ لمریز کال په لومړیو شپږو میاشتو کې د یاد ولایت د جاغوري، مالستان او اجرستان ولسوالیو اوسېدونکو د همدغو ولسواليو د ښوونځيو په بيارغونه، د درسي ټولګيو په جوړولو، د پاکو اوبو د څاګانو کيندلو او نورو چوپړونو په برخو کې په ټوليزه توګه ۲۰ مېليونه افغانۍ مرسته کړې ده.
د پوهنې پلاوي د ښوونځیو او کورنیو ترمنځ د پله په توګه د ښوونځیو شوراګانو د موثریت په اړه څرګنده کړه چې: دغو ولسوالیو ته د پوهنې ریاست د پلاوي د سفر اساسي موخه په یو شمېر هغو ښوونیزو ادارو کې د ښوونځیو شوراګانو جوړول دي، چې تر اوسه په کې شورا نه ده جوړه شوې.
