د پوهنې وزارت د استخدام رئیس د ننګرهار ولایت له یو شمېر ښوونیزو بنسټونو څخه لیدنه وکړه
پوهنې وزارت د استخدام رئیس مولوي محمد صادق «صدیقي» ننګرهار ولایت ته د خپل رسمي سفر په ترڅ کې، د مرکز جلاآباد ښار اړوند د عبدالوکیل، الای، شمس الدین مجروح، انګېزه شینواری، نجم الجهاد او صدیق الله رښتین ښوونځیو څخه لیدنه وکړه او د یادو ښوونیزو مرکزونو اداري، تدريسي او ښوونیز چاپېریال یې له نیږدې څخه وارزاوه.
همدارنګه نوموړي د یادو ښوونځيو د تعلیمي وضعیت له هر اړخیز تحلیل څخه وروسته اړونده مسئولینو ته لازمې لارښوونې وکړې او هغوی ته یې د یو شمېر ستونزو د حل په برخه کې د همکارۍ ډاډ ورکړ.
په ورته مهال د پوهنې سیمه ییزو مسئولینو د پوهنې وزارت د استخدام ریاست پلاوي ته ښه راغلاست ووایه او څرګنده یې کړه، چې د مشرتابه د لارښوونو په رڼا کې به خپلې ورځنۍ چارې په پوره لېوالتیا پر مخ وړي.
